Shqipëria në krizë, nevojitet një rrugë e re

“Kriza që ka mbërthyer Shqipërinë po thellohet, ndërkohë që situata ekonomike dhe e demokracisë në vend sa vjen e përkeqësohet”, deklaroi Kryetari i Partisë Socialiste Edi Rama gjatë bashkëbisedimit të përjavshëm me gazetarët. Rama tha se rishikimi i buxhetit ishte një tregues i qartë i krizës ekonomike që qeveria po përpiqet ta fshehë duke manipuluar shifrat, ndërkohë që edhe vetë mënyra në të cilën u miratua buxheti përbën një provë të mëtejshme të mungesës së një demokracie funksionale në Shqipëri. Përpjekja për ta vënë Shërbimin Informativ nën kontrollin e qeverisë u shpreh ai, është veç një fakt më shumë që tregon se qeveria shqiptare nuk është e gatshme të pranojë normat e bashkëjetesës demokratike të një vendi anëtar të NATO-s, por udhëhiqet nga interesa të errëta në emër të së cilave është e gatshme të shkojë kundër interesave të NATO-s dhe SHBA. Rama deklaroi po ashtu se kriza më e fundit me Presidentin e Republikës të cilin mazhoranca e akuzon se po shkel kushtetutën dhe se po bllokon Gjykatën Kushtetuese është thjesht një produkt i përpjekjeve të qeverisë për të vënë nën kontroll të gjitha aspektet e jetës publike e politike në Shqipëri.

“Gjuha e përdorur kundër Presidentit, argumentet e përdorura kundër tij, janë as më shumë e as më pak, po shprehja e një krize të thellë, që është një krizë në radhë të parë organike e këtij pushteti. E këtij pushteti i cili buron nga një grabitje dhe nuk mund të rrijë në këmbë pa nënshtruar gjithçka, gjë që sigurisht nuk do të arrijë ta bëjë. Për këtë arsye sot kjo qeveri është më qartë se asnjëherë tjetër në sytë e shqiptarëve problemi kryesor që ne kemi dhe që duhet të zgjidhim për të mundur që të merremi pastaj me problemet e mëdha që ka vendi, që vetëm do të thellohen dhe do të vështirësohen në rast se ky problem kryesor do të qëndrojë në mes nesh dhe të ardhmes si një pengesë për të parë drejt integrimit duke rritur mirëqenien, duke rritur punësimin.”

I pyetur në lidhje me pritshmëritë e tij për shtatorin dhe klimën politike kur të rifillojë jeta parlamentare, Rama deklaroi se që Shqipëria të dalë nga situata e vështirë ku ndodhet aktualisht nevojitet zgjidhja e krizës. Dhe kjo, tha ai, kërkon largimin e qeverisë. “Në rast se kjo qeveri nuk largohet ka vetëm përkeqësim jo për shkakun tonë të opozitës shqiptare, jo për shkakun e Presidentit të Republikës, jo për shkakun e Drejtorit të Shërbimit Sekret, jo për shkakun e NATO-s apo SHBA-së, as për shkakun e të gjithë atyre njerëzve që sot janë përditë e më të pashpresë, por thjesht dhe vetëm për shkakun e keqqeverisjes dhe të babëzisë që karakterizon përditshmërinë e këtij pushteti të vjedhur.”

Rama komentoi akuzat që i ka bërë mazhoranca Presidentit duke thënë se diskutimi i meritave të pretendimeve të PD për shkeljen e Kushtetutës do të ishte thjesht një humbje kohe dhe respekti për veten. “Ata çdo ditë gdhihen me dy këmbët mbi kushtetutën dhe ngrysen duke i lënë këpucët mbi kushtetutën para se të shkojnë të flenë. Janë në shkelje konstante të Kushtetutës. Nuk kanë gojë të flasin për Kushtetutën” ...vijon në brendi