Postuar më: 17/04/2010

Shifrat e publikuara nga Banka e Shqipërise vërtetuan së fundmi atë që Partia Socialiste po deklaronte prej disa muajsh, se në fakt rritja ekonomike në Shqipëri ka ndaluar, me një tendencë të rrezikshme për regres ekonomik në të ardhmen. Sipas Bankës së Shqipërise rritja nominale në vitin 2009 ka qenë 2.3% po aq sa edhe inflacioni - duke provuar një fakt që duket se tanimë po e pranon edhe INSTAT i cili ka treguar për një rritje ekonomike negative prej 0.8% në tremujorin e fundit të 2009. Kështu provohet edhe njëherë se në 15 muaj qeveria Berisha e çoi Shqipërinë nga rritja dyshifrore (ne fakt 8.7 %) në rritje ekonomike negative. Ajo që shqetëson më tepër është se në llogaritjet e INSTAT nuk janë marrë parasysh rritja çmimeve të ujit e energjisë, dhe as regjimi i ri tatimor për bizneset e vogla. Këto pritet ta kenë përkeqësuar akoma më tepër performancën e ekonomisë në tremujorin e parë 2010.